ទីស្ដីការក្រសួងមហាផ្ទៃ៖ ឯកឧត្តមសន្តិបណ្ឌិត ម៉ៅ ច័ន្ទតារា អញ្ជើញជាអធិបតីក្នុងពិធីសន្និបាតបូកសរុបលទ្ធផលការងារឆ្នាំ២០២៤ និងទិសដៅការងារឆ្នាំ២០២៥ របស់អគ្គលេខាធិការដ្ឋាន ក្រសួងមហាផ្ទៃ
ទីស្តីការក្រសួងមហាផ្ទៃ៖ នារសៀលថ្ងៃព្រហស្បតិ៍ ទី១២ ខែធ្នូ ឆ្នាំ២០២៤ ឯកឧត្តមសន្តិបណ្ឌិត ម៉ៅ ច័ន្ទតារា រដ្ឋលេខាធិការប្រចាំការ ក្រសួងមហាផ្ទៃ តំណាងដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជាអធិបតីក្នុងពិធីសន្និបាតបូកសរុបលទ្ធផលការងារឆ្នាំ២០២៤ និងទិសដៅការងារឆ្នាំ២០២៥ របស់អគ្គលេខាធិការដ្ឋាន ក្រសួងមហាផ្ទៃ ដោយមានការអញ្ជើញចូលរួមពី ឯកឧត្ដម រដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង ព្រមទាំងឯកឧត្តម លោកជំទាវ តំណាងអគ្គនាយកដ្ឋានចំណុះក្រសួងមហារផ្ទៃ ប្រធាន អនុប្រធាននាយកដ្ឋាន នាយការិយាល័យ និងមន្ត្រីចំណុះអគ្គលេខាធិការដ្ឋានជាច្រើនរូបទៀតផងដែរ។
ជាកិច្ចចាប់ផ្ដើម ឯកឧត្តម ឧត្តមសេនីយ៍ឯក ផាត សុផានិត អគ្គលេខាធិការ នៃអគ្គលេខាធិការដ្ឋាន ក្រសួងមហាផ្ទៃ មានមតិស្វាគមន៍ និងរាយការណ៍អំពីលទ្ធផលការងារឆ្នាំ២០២៤ និងទិសដៅការងារឆ្នាំ២០២៥ របស់អគ្គលេខាធិការដ្ឋាន។
ជាកិច្ចចុងក្រោយនៃអង្គសន្និបាត ឯកឧត្តមសន្តិបណ្ឌិត បានមានប្រសាសន៍គាំទ្រនិងវាយតម្លៃចំពោះភាពរីកចម្រើនរបស់អគ្គលេខាធិការដ្ឋាន ជាពិសេសពាក់ព័ន្ធទៅនឹងការកែលម្អលំហូរការងារក៏ដូចជាការផ្សារភ្ជាប់ទៅនឹងបច្ចេកវិទ្យាព័ត៌មានវិទ្យាសម្រាប់ការអនុវត្តការងារប្រចាំថ្ងៃរបស់អគ្គលេខាធិការដ្ឋាន និងចូលរួមអបអរសាទរចំពោះសមិទ្ធផលដែលសម្រេចបាន សូមកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែង និងការផ្ដេជ្ញាចិត្តរបស់ថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ចំណុះឱ្យអគ្គលេខាធិការដ្ឋាន ដែលបានខិតខំរួមគ្នាសម្រេចបានត្រឹមរយៈពេលជាងមួយឆ្នាំកន្លងមកនេះ។ ឯកឧត្តមបន្តថា ចំពោះលទ្ធផលដែលអគ្គលេខាធិការដ្ឋានសម្រេចបានកន្លងមកនេះ គឺពិតជាបានរួមចំណែកក្នុងការអភិវឌ្ឍគោលនយោបាយនិងយុទ្ធសាស្ត្ររបស់ក្រសួងមហាផ្ទៃ ក្នុងការលើកកម្ពស់ការផ្ដល់សេវានិងបង្កើនប្រសិទ្ធភាពការងាររបស់ស្ថាប័ន ក្រោមការដឹកនាំដ៏មុតស្រួចរបស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ៕
ដោយ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ